Самарқанд туман ҳокимлигининг расмий веб-саҳифасига хуш келибсиз!


ХАЛҚ ДЕПУТАТЛАРИ САМАРҚАНД ТУМАН КЕНГАШИ ВА ТУМАН ҲОКИМЛИГИ ГАЗЕТАСИ

yagona-oyna




ТАРАҚҚИЁТ ТАЯНЧИ


  Бугун мамлакатимизнинг қайси гўшаси, қайси манзилига борманг, Ватанни янада обод этиш истагида яшаётган юртдошларимизнинг эзгу саъй-ҳаракатларига гувоҳ бўласиз. Бу манзарани ери саховатли, эли меҳнаткаш ва меҳмондўст Самарқанд туманида ҳам яққол кўриш мумкин. Ўтган асрнинг 70-80 йилларидаёқ деҳқончилик, боғдорчилик маҳсулотлари етиштириш борасида энг юқори кўрсатгичларга эришиб, нафақат вилоятда, балки республикада донг таратган туман меҳнат аҳли Зарафшон тизма тоғларининг деҳқончилик учун ноқулай Миронқулу Оҳалик, Оқбуйрою Илонсой қир-адирларида ҳам халқимиз дастурхонига энг сара мева ва сабзавотлар етиштириб келишди. Шунингдек Дарғом каналидан сув насослари орқали оби ҳаёт чиқариб туман ҳудудидаги Чунгул, Янгиарқ каби чўл ва партов ерларида мўл ҳосил яратишди. Бундан ташқари туманда саноат маҳсулотлари ишлаб чиқариш, хусусий тадбиркорлик объектлари ташкил этилди. Ушбу саноат ва ҳунармандчилик корхоналарида ишлаб чиқарилаётган маҳсулотлар сифатлилиги ва рақобатбатбарошлиги билан хорижий товарлардан қолишмайди.

   Самарқанд туман ҳокими Ботир Қодиров билан бўлган сўҳбатимиз йўналиши асосан ана шу мавзу доирасида кечди.

   -Ботир Мамирович, маълумки, сиз раҳбарлик қилаётган туманнинг республикада ўз салоҳияти ва ўрни бор. Ушбу муқаддас заминда Хожа Кафшер, Хожа Аҳрори Валий ва Хожа Абди Берун сингари бузургворлар куним топганлиги ҳам киши қалбида муайян даражада масъулият ҳиссини уйғотади. Шундай эмас-ми?

   - Ҳа, албатта. Энг аввало шуни таъкидлаш лозимки, Самарқанд тумани ва унинг аҳолиси мен учун бегона эмас. Илгари бир неча йиллар бу ерда туман ҳокимининг биринчи ўринбосари бўлиб ишлаганман. Шу боис туманнинг деҳкончилик борасидаги шонли тарихи, фидокор халқнинг меҳнатсеварлиги, қолаверса иқтисодий имкониятлари билан яқиндан танишман. Бу ернинг халқи шундай меҳнаткашки, фақат имконият яратиб берсангиз бўлди, у ёрини узларига қўйиб бераверинг. Шул сабабдан кексаларига таъзим айласам, ёшларига ҳурмат бажо келтираман. Рағбат эса доимо муваффақиятларга йўл очиб беради.

   Республикамизнинг бошқа жойларидаги каби туманимизда ҳам ернинг “ўз эгасини топгани” қишлоқ хўжалик маҳсулотлари ишлаб чиқариш ҳажмини кенгайтириш салморини аввалдагидан ҳам ошириб юборди. Сўзларимни рақамлар асосида мустаҳкамлайдиган бўлсам, туманда 500 та фермер хўжалиги фаолият юритиб, уларда мева, сабзавот ва чорвачилик маҳсулотлари, яъни асосан парранда гўшти, тухум ва балиқ етиштирилади. Борларимизнинг асосий қисмини токзорлар ташкил этиб, асосан саноатбоп ва майизбоп узумлар парвариш қилинади. Шу йилнинг бошида Самарқанд шаҳрида бўлиб ўтган оламшумул халкаро илмий конференция қатнашчиларининг туманимизга ташриф буюрганлиги, ту­ман меҳнат аҳлининг Ўзбекистонда муҳим озиқ- овқат маҳсулотлари захира дастурини амалга ошириш борасида бажараётган ишлари, озиқ-овқат маҳсулотлари сифати ва салмори, дехқончилик иш­лари кулами, қишлоқ инфраструктураси, аҳолининг турмуш тарзи билан яқиндан танишганлиги ҳар қанча эътирофга молик ҳодисадир. Аслида мақтаса арзигулик жиҳатларимиз ҳам бор. Масалан, раҳматли уста деҳқон Юсуфжон Солиев ташкил этган “Оҳалик олтин боғи меваси” фермер хўжалиги тасарруфидаги 680 гектарлик интенсив боғда ҳар йили 20 минг тоннадан ортиқроқ мева етиштири­лади. Етиштирилган маҳсулотнинг асосий қисми саноат асосида қайта ишланиб, қадоқланиб, ундан ортиқ мамлакатларга экс­порт қилинади. Шу тариқа ўтган йили фермер хўжа­лиги жамоаси 3 миллион АҚШ доллари миқдорида соф фойда кўрганлиги кишини қувонтиради.

   “Агромир-Самарқанд” қўшма корхонасида иш­лаб чиқарилаётган юқори сифатли озиқ-овқат маҳсулотлари нафақат Ўзбекистонда, балки хориж мамлакатларида ҳам ўз харидорларига эга. Корхонада ишлаб чиқарилаётган қадоқланган шарбатлар, ичимликлар ва консервалар рақобатбардошлиги туфайли жаҳон бозорини забт этганлиги туманимизнинг, қолаверса Самарқанд вилояти ва республи­камизнинг обрўсидир. Шунингдек “СамРосХолод”, “Оҳалик-Ломанн-парранда” чиқарилаётган саноат ва озиқ-овқат маҳсулотлари ҳам жахон бозорида ўз харидорларини топганлиги қувончли ҳолдир. 

   Озиқ-овқат мустақиллигини таъминлаш ва аҳолини озиқ-овқат маҳсулотлари билан мунтазам таъминлашда қишлоқ хўжалигини, хусусан шахсий томорқаларни ривожлантириш муҳим аҳамиятга эга. Бугун нафақат мамлакатимиз учун, балки бутун дунё учун озиқ-овқат маҳсулотлари хавфсизлиги ва сифати долзарб аҳамият касб этмоқда. Маълумки, озиқ-овқат маҳсулотлари қанчалик кўп етиштирилса аҳоли шунчалик тўқ ва фаровон ҳаёт кечиради. Бунинг учун кекса деҳқонлар ўғитлари ва маслаҳатларига амал қилиш фойдадан холи эмас. Негаки, улар ҳар қарич ерни бекор қолдирмай тўқсан босди экинлар парваришига алоҳида эътибор беришган. Бор қатор оралари, ариқлар бўйлари, ҳовлидаги томорқалар, даладаги увотлар, ариқ-зовурлар ёнларига, ҳатто ташландик ерларда турли-туман кўкатлар, райхон, пиёз, саримсоқ пиёз, карам ва бошқаларни экиб, парваришини қучайтирганлар. Беҳуда доно халкимиз “Қозонда бўлса, чўмичга чиқади!” дея айтмаганда. Ўз томарқасида, ташландиқ ерларда униб-ўсиб ҳосилга кирган маҳсулотлардан тайёр овқат пиширганга нима етсин! Бунинг учун иш кўзини билиб меҳнат қилиш ҳар қарич ердан унумли фойдаланиш зарур.